அன்றைக்கு மன்னர்களும் , குறுநில
மன்னர்களும் மக்களை ஆண்டனர்;
இன்றைக்கு பிரதமர்களும், முதல்வர்களும்
மக்களை ஆள்கின்றனர் !
அன்றைக்கும் ஒரு நாட்டை கைப்பற்ற
படைவீரர்களை பயன்படுத்தினர்;
இன்றைக்கும் ஒரு தொகுதியை
கைப்பற்ற அடியாட்களை
பயன்படுத்துகின்றனர் !
அன்றைக்கு படைவீரர்களை தெம்பூட்ட
"கள்" கொடுத்தார்கள்; இன்றைக்கு
வாக்காளர்களை கவர "சாராயம்"
கொடுக்கிறார்கள்
அன்றைக்கு அரசசபையில் நாட்டியக்காரர்கள்
இருந்தார்கள்; இன்றைக்கு நாட்டியக்காரராக
இருப்பதுதான் நாட்டை ஆள்வதற்கான
முதல் தகுதியே !
அன்றைக்கும் மந்திரிகளை அரசர்களே
தேர்வு செய்தனர்; இன்றைக்கும் மந்திரிகளை
முதல்வர்களே தேர்வு செய்கின்றனர் !
அன்றைக்கு மந்திரிகளுக்கு மதியூகம்
தகுதியாக கருதப்பட்டது; இன்றைக்கு
மந்திரிகளுக்கு துதியூகம் தகுதியாக
கருதப்படுகிறது !
அன்றைக்கு மந்திரிகள் வரும்பொருள்
உரைப்பவர்களாக இருந்தார்கள்; இன்றைக்கு
மந்திரிகள் வரும்பொருள் பறிப்பவர்களாக
உள்ளனர் !
அன்றைக்கு மந்திரிகள் வேதங்களுக்கு
உரை எழுதினர்; இன்றைக்கு மந்திரி
கட் அவுட்டுக்கு உரை எழுதுகின்றனர்!
அன்றைக்கு அரச சபையில் புலவர்கள்
இருந்தார்கள்; இன்றைக்கு சட்டசபை
உறுப்பினர் ஒவ்வொருவரும் புலவர்களாக
இருக்கின்றனர் !
அன்றைக்கு அரசர்களைப் புகழ்ந்துப்
பாடினால் பரிசு கிடைக்கும், இன்றைக்கு
முதல்வர்களைப் புகழ்ந்துப் பாடினால்
பதவி கிடைக்கும் !
அன்றைக்கும் அரசர்களை பெயர்சொல்லி
அழைக்காமல் ராஜாதி ராஜ, ராஜ கம்பீர,
ராஜ மார்த்தாண்ட, ராஜ விக்கிரம சக்கரவர்த்தி
என்று அழைத்தனர்; இன்றைக்கும்
முதல்வர்களை பெயர்சொல்லி அழைக்காமல்
இதயதெய்வம், முத்தமிழ் அறிஞர்,
புரட்சி தலைவர், புரட்சி தலைவி
என்றே அழைக்கின்றனர் !
அன்றைக்கும் அரசசபையை எதிர்த்துப்
பேசினால் கத்திப் பாயும்; இன்றைக்கும்
சட்டசபையை எதிர்த்துப் பேசினால்
குண்டாஸ் பாயும் !
அன்றைக்கும் மன்னர்கள் ஓய்வெடுக்க
அந்தபுரம் இருந்தது; இன்றைக்கும்
முதல்வர்கள் ஓய்வெடுக்க கொடநாடுகள்
இருக்கின்றன!
அன்றைக்கும் மன்னர்களின் புதல்வர்கள்
இளவரசர்களாக இருந்தார்கள்; இன்றைக்கும்
முதல்வர்களின் புதல்வர்கள் துணை
முதல்வர்களாக இருக்கிறார்கள் !
முடி அரசுக்கும், குடி அரசுக்கும்
எனக்கு எந்த வேறுபாடும் தெரியவில்லை;
உங்களுக்கு தெரிந்தால் சொல்லுங்கள்.....
(அடிப்படை : பாவலர் இன்குலாப் அவர்களின்
"ஜனநாயகம் தூசு தட்டிய போது... "
கட்டுரைத் தொகுப்பு)
- அங்கனூர் தமிழன் வேலு
கருத்துகள் இல்லை:
கருத்துரையிடுக